د روسیې د بهرنیو چارو وزیر: د امریکا او ایران په مذاکراتو کې لاسوهنه نه کوو
د روسیې د بهرنیو چارو وزیر سرګي لاوروف ویلي، چې مسکو د امریکا او ایران ترمنځ د مذاکراتو بهیر ته د مستقیم ننوتلو او یا لاسوهنې هېڅ اراده نه لري او د دغو خبرو د بریا لپاره هیلهمند دی.
سرګي لاوروف نن دوشنبه د غويي ۲۸مه د استوايي ګینې د بهرنیو چارو له وزیر سیمون اویونو اسونو انګه سره تر لیدنې وروسته، په یوه خبري غونډه کې وویل، چې مسکو د واشنګټن او تهران په مذاکراتو کې مداخله نه کوي. لاوروف دا څرګندونې پر داسې مهال کړې، چې په وروستیو کلونو کې د ایران او روسیې ترمنځ سیاسي، اقتصادي او امنیتي اړیکې خورا خرابې شوې دي، خو لا هم روښانه نه ده چې د امریکا او ایران ترمنځ د مستقیمې جګړې د شدت په صورت کې به مسکو تر کومې کچې د تهران ملاتړ وکړي.
د روسیې دا دریځ د تهران او واشنګټن ترمنځ د کړکېچ د زیاتېدو او د مذاکراتو له بندېدو سره هممهاله په ډاګه کېږي او یو داسې وضعیت رامنځته شوی، چې د دواړو هېوادونو ترمنځ یې د یوې نوې احتمالي جګړې اندېښنې راپورته کړې دي.
