شاه محمود میاخېل: د بشر حقونو ادارې او ملګري ملتونه دې د «پي ټي اېم» د مشرانو قضیې وڅېړي
د تېر جمهوري نظام د دفاع وزارت سرپرست شاه محمود میاخېل له نړیوالو بشري حقونو بنسټونو او ملګرو ملتونو غوښتي، چې د پښتون ژغورنې غورځنګ د دوو مشرانو نورالله ترین او حنیف پښتین د «اختطاف» او بېدرکۍ قضیه وڅېړي او د هغوی د ځای معلومولو او خوشې کولو لپاره عملي اقدام وکړي.
شاه محمود میاخېل په یوه تازه پیغام کې له نړیوالو بشري حقونو ادارو او د ملګرو ملتونو له سازمان څخه غوښتنه کړې چې د پښتون ژغورنې غورځنګ د دوو مشرانو نورالله ترین او حنیف پښتین د برخلیک په معلومولو کې اقدام وکړي.
نوموړي ویلي چې یاد دوه مشران د ۲۰۲۵ کال د نومبر په ۱۲مه د پېښور له یوې امن جرګې وروسته د پاکستاني استخباراتي ادارو له لوري په زور اختطاف شوي او تر اوسه یې هېڅ کره معلومات نشته.
میاخېل زیاتوي، چې دغه کسان د جرګې له پای ته رسېدو وروسته د پېښور له مرکزه په زور بېدرکه شوي او نه عدلي بنسټونو ته وړاندې شوي او نه هم د هغوی د ځای په اړه رسمي وضاحت ورکړل شوی دی.
هغه ټینګار کړی چې د دغو فعالانو د اوږدمهاله نادرکه کېدو له امله د هغوی کورنۍ او ملګري سخت اندېښمن دي.
میاخېل له نړیوالو ادارو غوښتي چې د ورته پېښو د مخنیوي او د ورکو شویو کسانو د خوشې کېدو لپاره عملي او عاجل اقدامات وکړي.
