پښتون ژغورنې غورځنګ د فرید اپریدي د سملاسي خوشې کېدو غوښتنه کړې
د پښتون ژغورنې غورځنګ د یوې اعلامیې په خپرولو سره د خپل فعال غړي فرید اپریدي د سملاسي او بې قید و شرطه خوشې کېدو غوښتنه کړې ده. دغه غورځنګ خبرداری ورکړی چې که نوموړی ژر خوشې نه شي، په ټوله نړۍ کې به پراخ لاریونونه او سولهییز ولسي کمپاینونه پیل کړي.
په اعلامیه کې راغلي، چې د فرید اپریدي د ژوند او امنیت بشپړ مسوولیت د پاکستان پر ریاستي ادارو دی. د پښتون ژغورنې غورځنګ غوښتنه کړې چې د دې پېښې باید شفافه پلټنه وشي او عاملین یې عدالت ته وړاندې شي.
دغه غورځنګ وایي چې د سیاسي او ولسي فعالانو جبري لادرکي د حق غږونو د خاموشه کولو لپاره د ریاست یوه ناکامه هڅه ده.
پي ټي ایم د بشري حقونو پر نړیوالو سازمانونو، رسنیو، ملګرو ملتونو او عدالت غوښتونکو فعالانو غږ کړی چې د فرید اپریدي د جبري بې درکۍ پر ضد خپل غبرګون وښيي. په اعلامیه کې ټینګار شوی چې د ظلم او جبر په زور د ولس شعور نه شي ختمېدلی او دا کړنه د بشري حقونو او انساني وقار ښکاره نقض دی.
فرید اپریدی د دوشنبې په ورځ د پېښور له ابدرې سړک څخه تښتول شوی، چې غورځنګ یې پړه د پاکستان پر استخباراتي ادارو اچوي او وایي چې د امنیتي کمرو شواهد هم شتون لري. پښتون ژغورنې غورځنګ ګواښ کړی چې که فرید اپریدي ته کوم زیان ورسېږي، نو دوی به د دې ظلم پر ضد نړیوال غږ پورته کړي او خپل اعتراضونه به نور هم پراخ کړي.
دا په داسې حال کې ده چې په پاکستان کې د پښتنو او د پښتون ژغورنې غورځنګ د غړو پر وړاندې نیونې او فشارونه زیات شوي دي. په دې وروستیو کې د دې غورځنګ یو جګپوړی غړی علي وزیر له زندان څخه تر خوشې کېدو وروسته سمدستي بیا ونیول شو.
