په باجوړ کې د ګوزڼ ضد واکسینو کمپاین پرمهال پر دنده بوخت دوه پولیس په ډزو وژل شوي دي
ناپېژاندو وسلهوالو د خیبرپښتونخوا په باجوړ کې په دوو جلا پېښو کې د ګوزڼ ضد واکسینو کمپاین پرمهال پر دنده بوخت دوه پولیس په ډزو وژلي دي. د باجوړ د پولیسو مشر محمد خالد ویلي، لومړۍ پېښه د سالارزو سیمې په نازکۍ کلا سیمه کې شوې چې پهکې یو پولیس وژل شوی دی.
د نوموړي په وینا؛ له لومړۍ پېښې وروسته د پلټنو او لټون عملیاتو پرمهال دویمه پېښه په تابۍ کلي کې رامنځته شوه. په دغه پېښه کې یو بل پولیس چې د ګوزڼ ضد واکسینو کمپاین پرمهال پر دنده بوخت و، د وسلهوالو په ډزو ټپي شو او وروسته یې ساه ورکړه.
ځایي سرچینو ویلي، تر دغه بریدونو وروسته په سالارزو او د باجوړ په نورو سیمو کې امنیتي تدابیر سخت شوي او د بریدګرو د نیولو لپاره عملیات دوام لري. د پاکستان لومړي وزیر شهباز شریف هم دغه پېښې غندلې او امنیتي ادارو ته یې د بریدګرو د نیولو سپارښتنه کړې ده.
دغه بریدونه داسې مهال شوي، چې په پاکستان کې د ګوزڼ ضد واکسینو اوونیز کمپاین پیل شوی او ټاکل شوې له ۱۹ مېلیونو څخه ډېر ماشومان پهکې واکسین شي. په وروستیو کلونو کې د ګوزڼ ضد واکسینو کمپاین کارکوونکي او د هغوی امنیتي ساتونکي په ځانګړي ډول په خیبرپښتونخوا او بلوچستان ایالتونو کې په وار، وار په وسلهوالو بریدونو کې په نښه شوي دي.
