د کندهار یو بڼوال وایي «ناپېژاندو کسانو یې د انګورو باغ له منځه وړی»
د کندهار ولایت د معروف ولسوالۍ یو اوسېدونکي افغانستان انټرنشنل ـ پښتو ته ویلي چې ناپېژاندو کسانو یې د انګورو باغ له منځه وړی او شاوخوا څلور زره د انګورو تاکونه یې له بېخه پرې کړي دي. په کندهار کې د طالبانو ادارې تراوسه دغه ادعا نه ده تایید کړې.
هغه وایي، سره له دې چې دا یوه لویه پېښه ده، خو تر اوسه د طالبانو هېڅ امنيتي ارګان او مسوولې ادارې د قانون له مخې جدي اقدام نه دی کړی.
د معروف ولسوالۍ دغه اوسېدونکي زیاته کړې، هغه کسان چې دا کار یې کړی، لا هم په ازاده توګه ګرځي او د عامو خلکو حقونو ته درناوی نه کېږي.
نوموړي د مسوولو کسانو نومونه نه دي یاد کړي، خو په رااستول شوې ویډیو کې ښکاري، چې د انګورو تاکونه له منځه وړل شوي دي.
افغانستان انټرنشنل ددې ویډیو پلټنه وکړه، خو تراوسه په رسمي ډول ددې پېښې تصدیق نه دی شوی.
نوموړي خبرداری ورکړی، چې که په سیمه کې امنیت او قانون په سمه توګه عملي نه شي، خلک به د خپلو مالونو، باغونو او جایدادونو ساتنه ونه شي کړای.
هغه له طالبانو غوښتنه کړې چې د پېښې عاملین ونیسي، عدالت تامین کړي او د ولس د حقونو د خوندي کولو لپاره عملي ګامونه واخلي.
