د سرپل ولایت په کوهستانات ولسوالۍ کې د طالبانو د پوهنې امر هغه ښوونکي په تونده لهجه ګواښلي چې د معاشونو د ځنډېدو له امله یې شکایت کړی و. مولوي محمد نعمان په یوه غږیز پیغام کې ښوونکي ګواښلي، چې که طالبان اجازه ورکړي له ستوني به یې ونیسي او سا به یې ور وباسي.
افغانستان انټرنشنل- پښتو ته په استول شوي غږیز پیغام کې د یادې ولسوالۍ د طالبانو د معارف امر مولوي محمد نعمان ښوونکي ګواښي، چې «که اسلامي امارت اجازه راکړي له ستونې مو نیسم، سا مو باسم».
نوموړي په خپل غږیز پیغام کې ادعا کړې چې په پخوانیو نظامونو کې هم د ښوونکو معاشونه تر اوو میاشتو ځنډېدل، خو د هغه په وینا، هېچا شکایت نه کاوه.
هغه زیاتوي چې اوس ښوونکي د طالبانو له «ښه نیت» څخه ناوړه استفاده کوي.
بلخوا، د کوهستاناتو ولسوالۍ یو شمېر اوسېدونکو او ښوونکو افغانستان انټرنشنل- پښتو ته ویلي چې شاوخوا دوه میاشتې کېږي خپل معاشونه یې نه دي ترلاسه کړي او له سختو اقتصادي ستونزو سره مخ دي.
یوه ښوونکي، چې نه یې غوښتل نوم یې خپور شي، ویلي: «۶ زره افغانۍ معاش لرم، دوه میاشتې کېږي معاش مې نه دی اخیستی او لس ورځې کېږي چې په کور کې د پخلي غوړي نه لرو».
یو بل ښوونکي هم ویلي چې د اختر په رانږدې کېدو سره نه شي کولی خپلو ماشومانو ته د اختر جامې او نور اړین توکي برابر کړي.
دا شکایتونه داسې مهال مطرح کېږي چې په افغانستان کې د اقتصادي ستونزو او بې وزلۍ د زیاتېدو له امله ګڼ دولتي کارکوونکي د معاشونو له ځنډ او د ژوند له سختو شرایطو شکایت کوي.
