د خیبر ولسوالۍ په تیرا دره کې پر پـاکستـاني ځواکونو چاودنه شوې
د خیبر پښتونخوا د خیبر ولسوالۍ اړوند په تیرا دره کې د پاکستان د سرحدي ځواکونو پر کاروان د ریموټ کنټرول بم چاودنه شوې، چې له امله یې یو نظامي وژل شوی او د یوه قوماندان په ګډون دوه نور نظامیان ټپیان شوي دي.
امنیتي سرچینو ویلي، چاودنه هغه مهال رامنځته شوه چې د ایف سي ځواکونو کاروان یوې نږدې امنیتي پوستې ته روان و.
د سرچینو په وینا، له برید وروسته امنیتي ځواکونو سیمه کلابنده کړې او د لټون عملیات یې پیل کړي دي.
ټپیان نږدې پوځي روغتون ته لېږدول شوي او د ځینو روغتیايي وضعیت د اندېښنې وړ ښودل شوی دی.
سیمه ییز پاکستاني امنیتي چارواکي وایي، د برید د څرنګوالي او کارېدلو چاودېدونکو توکو په اړه پلټنې روانې دي.
