د بلوچستان په دالبندین سیمه کې د کانکېندنې یوه شرکت درې کارکوونکي په ډزو وژل شوي
د بلوچستان ایالت چاغۍ ولسوالۍ مرکز په دالبندین سیمه کې د کانکېندنې یوه شرکت درې کارکوونکي په ډزو وژل شوي دي. ځایي پولیس وايي، د وژل شویو کسانو مړي د شنبې په ورځ د لویې لارې ترڅنګ موندل شوي او وروسته روغتون ته لېږدول شوي دي.
ځايي چارواکي وایي، وژل شوي کسان ظهیر احمد، وسیم او افضل نومېدل. وسیم د پنجاب ایالت د سرګودها او افضل د چینوټ ولسوالۍ اوسېدونکي وو او د کانکېندنې له یوه خصوصي شرکت سره یې کار کاوه.
د دغه کسانو مړي د عدلي او قانوني څېړنو لپاره روغتون ته لېږدول شوي دي. ځايي ادارې وایي، د پېښې په تړاو پلټنې روانې دي. تر دې مهاله کومې وسلهوالې ډلې د یادې پېښې مسوولیت نهدی منلی.
