د بېکارۍ پراخې څپې؛ ترکیه کې یو افغان وایي له ۱۶ کلونو زدهکړو وروسته پر مالدارۍ بوخت دی
یو افغان چې دامهال په ترکیه کې پر مالدارۍ بوخت دی وایي، د بېروزګارۍ له امله اړ شوی چې افغانستان پرېږدي او کډوالۍ ته مخه کړي. دغه ځوان ویلي، ۱۶کاله یې زدهکړې کړې او هیلهمن و چې خپل هېواد ته به د یوه لوستي ځوان په توګه خدمت وکړي؛ خو اوس د بېکارۍ له امله مالداري کوي.
هغه زیاته کړې:«۱۶ کاله مې زدهکړې وکړې او هیلهمن وم، چې خپل هېواد ته به د یوه لوستي ځوان په توګه خدمت وکړم؛ خو اوس د ژوند د اړتیاوو پوره کولو لپاره مالداري کوم». د هغه په وینا؛ په ډېرو سختو شېرایطو کې له سهار وختي تر ماښامه په کار بوخت وي او رخصتي هم نهلري.
نوموړي افغانستان انټرنشنل ته په لېږلي پیغام کې ویلي، چې له فراغت وروسته یې د کار موندلو لپاره ګڼو ادارو او دفترونو ته مراجعه وکړه؛ خو د ځان لپاره یې دنده ونه موندله او اړ شو، چې له هېواده بهر دغه ډول کار ته مخه کړي.
دغه افغان ځوان له طالب چارواکو غوښتي، چې ځوانانو ته د کار زمینه برابره کړي؛ څو د بېروزګارۍ له امله کډوالۍ ته اړ نهشي. د هغه په خبره؛ هرکال لسګونه افغانان د بېکارۍ او اقتصادي ستونزو له امله په ناقانونه توګه له هېواده وځي، چې دغه چاره د ګڼو ځوانانو د معلولیت او حتی مړینې لامل شوې ده.
راپورونه ښيي، چې د طالبانو له واکمنۍ وروسته په افغانستان کې د بېروزګارۍ او فقر کچه خورا لوړه شوې ده. ګڼ شمېر ځوانان وایي، چې د اقتصادي ستونزو له امله له سختو شرایطو سره مخ دي او ځینې یې حتی ځانوژنې ته اړ شوي دي.
