لنډي کوتل کې معترضان: پاکستان باید افغانستان کې بند پاتې موټر او چلوونکي یې راوباسي
پر ډیورنډ کرښه د تورخم دروازې د تړل کېدو له امله د خېبر پښتونخوا معترضو ټرانسپورټرانو حکومت ته درې ورځنۍ نېټه ورکړې، ترڅو په افغانستان کې د دوی بند پاتې موتړ او چلوونکي یې بېرته ورستانه کړي. یو شمېر پاکستاني موټرچلوونکي له تېرو اتو میاشتو راهیسې په افغانستان کې بند پاتې دي.
دغو معتریضانو د خېبر پښتونخوا ایالت د خېبر ولسوالۍ په لنډي کوتل سیمه کې د یادې لارې د بندیدو له کبله خپل احتجاج روان ساتلی دی.
معترضان چې د بېلابېلو سیاسي ګوندونو مشران هم ورسره دي، خبرداری ورکړی چې که په ټاکل شوې موده کې یې ستونزه هواره نه شي، دوی به د احتجاج په توګه د تورخم - پېښور لویه لاره وتړي. دغو ټرانسپورټرانو ویلي چې له سختو مالي ستونزو سره مخ دي او که غوښتنې یې ونه منل شي، نو افغانستان ته د ستنېدونکو افغان کډوالو د موټرو تګ راتګ به هم بند کړي.
له بلې خوا په پېښور کې د طالبانو د قونسلګرۍ یوه استازي پلاوي د دغه احتجاجي غونډې څخه لیدنه کړې ده. د دغه طالب پلاوي مشر عصمت الله قادري وویل چې دوی خېبر پښتونخوا کې د خپل قونسل محب الله شاکر په لارښوونه د ټرانسپورټرانو د ستونزو اورېدو لپاره ورغلي دي. د هغه په خبره، اغېزمنو ټرانسپورټرانو او سوداګرو څو ځله د دوی له قونسلګرۍ سره اړیکه نیولې او غوښتنې یې د طالبانو چارواکو ته رسول شوې دي.
عصمت الله قادري ټینګار وکړ، چې د طالبانو له خوا د پاکستاني موټرچلوونکو او د هغوی د موټرونو پر وړاندې هېڅ ډول خنډ نشته او هغوی کولی شي چې بېرته پاکستان ته ستانه شي. نوموړي د شینوارو او اپریدو قومونو له مرستو مننه وکړه او غوښتنه یې وکړه چې د اختر د رانږدې کېدو له امله باید د افغان کډوالو تګ راتګ له خنډ سره مخ نه شي.
د تورخم لارې تړل کېدل او د ټرانسپورټرانو ستونزې په داسې حال کې زیاتې شوې دي چې د طالبانو او پاکستاني ځواکونو ترمنځ پوځي کړکېچ دوام لري. په تېرو میاشتو کې د چمن او سپین بولدک په ګډون پر ډیورنډ کرښه بېلابېلو سیمو کې نښتې شوې دي او پاکستاني ځواکونو د کونړ په ګډون پر افغان خاوره بریدونه کړي چې له امله یې له ۱۰۰ زرو ډېر کسان بې ځایه شوي دي.
