د طالبانو د کډوالو او راستنېدونکو چارو وزارت وايي، چې د کونړ سرکاڼو ولسوالۍ لپاره د استوګنې ښارګوټي پلان په بحث کې دی او د سیمې کډوالو ته د استوګنې د ځمکو د ورکولو وړاندیزونه شریک شوي دي. دا موضوع د طالبانو د کډوالو او راستنېدونکو وزیر عبدالکبیر سره د سرکاڼو قومي مخورو بحث کړې.
د یاد وزارت په خبرپاڼه کې راغلي چې د یادې ولسوالۍ قومي مشرانو د راستنېدونکو او کډوالو اوسنی وضعیت تشریح کړ او وویل چې ګڼې کورنۍ د دایمي سرپناه اړتيا لري. د هغوی په وینا، په پشد سیمه کې د یوه استوګنیز ښارګوټي د جوړولو پلان وړاندې شوی او غوښتنه شوې چې د سیمې کډوالو ته په کې د استوګنې ځمکې ووېشل شي.
مولوي عبدالکبیر ویلي چې راستنېدونکو لپاره په مناسب ځایونو کې ښارګوټي په نظر کې نیول شوي او هڅه روانه ده چې د اړمنو ستونزې هوارې شي. هغه زیاته کړې چې د راستنېدونکو تر څنګ داخلي بېځایه شویو ته هم مرستې لېږل شوي او د لا زیاتو مرستو رسولو لپاره به کار دوام ولري.
د سرکاڼو د قومي مشرانو د وړاندیزونو په تړاو، د طالبانو یاد وزیر زیاته کړې چې موضوع به له اړوندو ادارو سره شریکه کړي او د حل لارې چارې به ولټول شي. وزارت د ځمکو د وېش په اړه د دقیقو میکانېزمونو یا نېټو جزییات نه دي ورکړي.
د کډوالو د ستنېدو او بېځایه کېدو موضوع په وروستیو میاشتو کې زیاته شوې ده. د افغانستان انټرنشنل د معلوماتو له مخې، تېر کال شاوخوا درې میلیونه افغان کډوال له ایران، پاکستان او ترکیې څخه بېرته راستانه شوي چې ډېری یې په زوره ایستل شوي دي.
د بشري حقونو بنسټونه وایي د پولیسو پراخې چاپې او جبري ایستنې د کورنیو د بېلتون او بشري ستونزو لامل شوې دي.
هممهاله ملګرو ملتونو اندېښنه ښوولې چې دا افغان کډوال خپل هېواد ته د ستنېدو پر مهال د سرپناوو له جدي ستونزو سره مخ کېږي او ان د هېواد په بېلابېلو ښارونو کې ورته د کرایي کورونو موندل هم ستونزمن شوي دي.
