په خیبر پښتونخوا کې د سختو ورښتونو له امله دوه کسان مړه او ۱۱ نور ټپیان شوي دي
په خېبر پښتونخوا کې د سختو ورښتونو او تندر پرېوتو له امله دوه کسان مړه او ۱۱ نور ټپيان شوي دي او لسګونه کورونه زيانمن شوي دي. ځایي چارواکي وايي، د یادو ورښتونو له کبله په شانګله کې يو ښوونځی هم زيانمن شوی دی.
د خیبر پښتونخوا ایالت د ناورينونو مديريت ادارې د معلوماتو له مخې؛ د ورښتونو له کبله تر ټولو ډېر زيان په شانګله، بټګرام، سوات او مردان کې اوښتی دی، چې پهکې څلور کورونه په بشپړه توګه نړېدلي او لسګونه نور برسېرن زيانمن شوي دي.
بلخوا د پاکستان د هواپوهنې ادارې خبر ورکړی، چې د روانې مئ میاشتې تر ۲۳مې پورې به په خېبر پښتونخوا او نورو شمالي سيمو کې د بارانونو، تالندې برېښنا او توپانونو لړۍ دوام وکړي. چارواکو خلکو ته سپارښتنه کړې، چې د خراب موسم پرمهال له غير ضروري سفرونو ډډه وکړي او احتياطي تدابير ونیسي.
