ډونالډ ټرمپ: له ایران سره خبرې اترې په وروستیو پړاوونو کې دي
د امریکا ولسمشر ډونالډ ټرمپ د چهارشنبې په ورځ وویل، چې له ایران سره خبرې اترې «وروستیو پړاوونو» ته رسېدلې دي، خو خبرداری یې ورکړ چې که تهران د سولې له تړون سره هوکړه ونه کړي، نو نور بریدونه به هم ترسره شي.
ټرمپ وویل چې روانه اوونۍ هغه د نورو بریدونو د ترسره کولو امر ته نږدې شوی و، خو د خبرو اترو د دوام لپاره یې دا پرېکړه ځنډولې ده.
هغه خبریالانو ته وویل: «موږ د ایران په اړه وروستیو پړاوونو کې یو. وبه ګورو چې څه کېږي. یا به تړون وشي، یا به موږ ځینې داسې کارونه وکړو چې لږ به سخت وي، خو هیله ده چې داسې ونه شي.»
ټرمپ زیاته کړه: «زه په مثالي ډول غواړم لږ خلک ووژل شي، نه ډېر. موږ دواړه لارې اختیارولی شو.»
نوموړي وروسته د امریکا د ساحلي ساتونکو اکاډمۍ ته په وینا کې هم خپل دریځ تکرار کړ او ویې ویل: «کېدای شي موږ ورباندې ډېر سخت بریدونه وکړو. خو ښايي اړتیا ورته پېښه نه شي.» هغه یو ځل بیا ټینګار وکړ چې ایران ته به د اټومي وسلې د ترلاسه کولو اجازه ورنه کړل شي.
بل خوا، تهران ټرمپ تورن کړ چې غواړي جګړه بېرته پیل کړي او خبرداری یې ورکړ چې که پر ایران بریدونه تکرار شي، نو غبرګون به یوازې تر منځني ختیځ محدود نه وي.
د ایران سپاه پاسداران په یوه اعلامیه کې ویلي: «که پر ایران تېری بیا تکرار شي، نو هغه ژمنه شوې سیمهییزه جګړه به دا ځل له سیمې هم واوړي.»
د ایران د پارلمان رییس او د سولې د خبرو اترو لوړپوړي استازي محمد باقر قالیباف په ټولنیزو رسنیو کې په خپاره شوي غږیز پیغام کې ویلي چې «د دښمن ښکاره او پټې هڅې» ښيي چې امریکایان د نوو بریدونو لپاره چمتووالی نیسي.
