مسعود پزشکیان: د فشار له لارې د ایران تسلیمول یوازې یو خیال دی
د ایران ولسمشر مسعود پزشکیان ویلي، چې د فشار او اجبار له لارې د ایران د تسلیمولو هڅه «یوازې یو خیال» دی او ټینګار یې کړی چې متقابل درناوی د جګړې په پرتله ډېر معقول، خوندي او دوامدار انتخاب دی.
پزشکیان په ایکس خواله رسنۍ کې لیکلي چې ایران تل خپلو ژمنو ته ژمن پاتې شوی او د جګړې د مخنیوي لپاره یې بېلابېلې لارې ازمویلې دي.
هغه لیکلي: «اسلامي جمهوریت تل خپلو تعهداتو ته ژمن پاتې شوی او د جګړې د مخنیوي لپاره یې ټولې لارې ازمویلې دي؛ زموږ له لوري لا هم ټولې لارې پرانیستې دي.»
د ایران ولسمشر زیاته کړې، چې د زور او فشار له لارې د ایران تسلیمول ناشونی کار دی او دا ډول تصور له واقعیت څخه لرې دی.
هغه ټینګار کړی: «په ډیپلوماسۍ کې متقابل درناوی د جګړې په پرتله ډېر هوښیار، خوندي او دوامدار انتخاب دی.»
د پزشکیان دا څرګندونې په داسې حال کې کېږي چې د ایران او امریکا ترمنځ د اړیکو، احتمالي خبرو او سیمهییزو امنیتي تحولاتو په اړه بحثونه لا هم دوام لري.
