د بلوچستان د بار وړونکو موټرو ټولنې په دغه ایالت کې پر بار وړونکو لاریو د بریدونو په غبرګون بشپړ کاربندیز اعلان کړی دی. د یادې ټولنې مشر حاجي نورمحمد شاهواڼي ویلي، چې پر بار وړونکو لاریو پرلهپسې بریدونو او د امنیت نشتوالي د ټرانسپورټ سکتور ته درانه مالي زیانونه اړولي.
شاهواڼي ویلي، هغه لارۍ چې د کرومایټ او مرمرو په څېر ګران بیه کاني ډبرې لېږدوي؛ پر لویو لارو په وار، وارپه نښه شوې دي. د نوموړي په وینا؛ وسلهوالو ګڼې لارۍ سوځولې، ټایرونه یې خراب کړي او ټرانسپورټي شرکتونو ته یې مېلیونونه کلدارې زیان اړولی دی.
هغه زیاته کړه: «په بلوچستان کې د کاني توکو لېږد اوس د عذاب بڼه خپله کړې ده. نه ایالتي حکومت، نه د کانونو څښتنان او نه هم قراردادیان زموږ همکاري کوي او نه زموږ د زیان جبران کوي».
د یادې ټولنې د معلوماتو له مخې؛ په وروستیو ورځو کې د مستونګ، خاران، واشک او خضدار په ګډون په بېلابېلو سیمو کې پر لاریو بریدونه شوي دي. دوی وایي، په دغه بریدونو کې شاوخوا ۱۲ لارۍ په نښه شوې، چې اته یې په بشپړه توګه سوځېدلې او پاتې نورو ته سخت زیان اوښتی دی.
د بار وړونکو لاریو ټولنې پرېکړه کړې، چې له دالبندین، نوکنډي، مسلم باغ او لورلایي سیمو څخه به هېڅ لارۍ کرومایټ او مرمر نه باروي. شاهواڼي خبرداری ورکړی، که هر شرکت یا د لارۍ مالک د کاربندیز پرېکړه ماته کړي او کاني توکي ولېږدوي؛ نو د هر ډول زیان پړه به یې پر خپله غاړه وي.
هغه ټینګار وکړ، چې د خوراکي توکو او نورو عامو مالونو لېږد به په عادي ډول روان وي او کاربندیز به یوازې د کاني توکو پر ټرانسپورټ تطبیقېږي.
