سعودي عربستان د ایران په تړاو د ټرمپ د ډیپلوماسۍ د پرېکړې هرکلی کړی
د سعودي عربستان د بهرنیو چارو وزیر ویلي چې ریاض د ډونالډ ټرمپ دا پرېکړه ستایي چې د جګړې د پای ته رسولو لپاره یې ډیپلوماسۍ ته د فرصت ورکولو پرېکړه کړې ده. فیصل بن فرحان پر ایران غږ کړی، چې له اوسني فرصت نه د خبرو اترو د پرمختګ په برخه کې ګټه واخلي.
فیصل بن فرحان هیله ښودلې، چې د هرمز تنګي په سیمه کې د سمندري تګ راتګ امنیت او ازادي بېرته پخواني حالت ته وګرځي او ټول مسایل داسې حل شي چې د سیمې امنیت او ثبات ورسره ښه شي.
سعودي عربستان د پاکستان د منځګړیتوب د هڅو ستاینه هم کړې ده.
ریاض له ایران څخه غوښتنه کړې چې د کړکېچ د زیاتېدو له خطرناکو پایلو د مخنیوي لپاره له رامنځته شوي فرصت څخه ګټه واخلي او ژر تر ژره د خبرو اترو د پرمختګ لپاره مثبت ځواب ورکړي، څو د ریاض په وینا، یو جامع توافق ته لاره هواره شي او د سیمې او نړۍ لپاره تلپاتې سوله تضمین کړي.
