د خیبر پښتونخوا په کورمه کې د دوو وسلهوالو ډلو ترمنځ نښته کې ۱۸ وسلهوال وژل شوي
د خیبر پښتونخوا ایالت په کورمې ولسوالۍ کې د دوو وسلهوالو ډلو ترمنځ په سختو نښتو کې لږترلږه ۱۸ وسلهوال وژل شوي دي. ځایي چارواکي وایي، په دغه نښته کې دواړه خواوو درنې وسلې کارولې او یادې جګړې څو ساعته دوام وکړ.
د پولیسو په وینا؛ دغه نښته د منځنۍ کورمې اړوند د مناتو کامران کلي په سیمه کې هغه مهال رامنځته شوه، کله چې د کاظم او ممتاز امتي په نوم د دوو وسلهوالو ډلو ترمنځ وسلهواله جګړه پیل شوه.
د پولیسو د معلوماتو له مخې؛ په وژل شویو کسانو کې د ممتاز امتي ډلې مشر هم شامل دی. د پاکستان امنیتي ځواکونو تر پېښې وروسته په سیمه کې امنیتي تدابیر سخت کړي او د نورو وسلهوالو د موندلو لپاره یې چاڼیز عملیات پیل کړي دي.
