کانګو کې د اېبولا وبا له امله د مړو شویو کسانو شمېر ۱۳۱ ته لوړ شو
د کانګو دیموکراتیک جمهوریت په ختیځ کې د اېبولا وبا له امله د مړو شویو کسانو شمېر ۱۳۱ ته لوړ شو. ځایي چارواکو ویلي، چې د یادې وبا له امله په تېرو ۲۴ ساعتونو کې ۲۶ نور شکمن کسان مړه شوي دي. لاتراوسه ۵۴۳ شکمنې او ۳۳ تایید شوې پېښې ثبت شوې او دوه پېښې په یوګانډا کې هم موندل شوې دي.
د روغتیا نړۍوال سازمان د یادې ناروغۍ د «بونډيبوګیو» نادره ډول خپرېدا له امله د نړۍوالې عامې روغتیا بېړنی حالت اعلان کړی دی. د یاد سازمان مشر ټېډروس ادهانوم ویلي، چې د یادې وبا د خپرېدو چټکتیا او پراختیا جدي اندېښنې راپارولې دي.
چارواکي وایي، دغه ناروغي په جګړه ځپلو او ګڼ مېشتو سیمو کې په چټک ډول خپرېږي چې د پېښو تشخیص هم د محدودو لابراتواري امکاناتو له امله سوکه روان دی. د روغتیا نړۍوال سازمان خبرداری ورکړی، چې د پولې بندول د وضعیت د لا کړکېچنېدو لامل کېدای شي او هېوادونو ته یې د همغږۍ سپارښتنه کړې ده.
اېبولا د بدن د مایعاتو له لارې انتقالېږي او د دغه ناروغۍ د مړینې منځنۍ کچه شاوخوا ۵۰ سلنه ده. کارپوهان وایي، چې د وروستي ځنډ او کمزوري چمتووالي له امله د یادې وبا د کنټرول هڅې له ننګونو سره مخ دي.
