تحریک انصاف ګوند او د پاکستان حکومت اپوزېسیون اعلان کړی، چې د جمعې په ورځ به د عمران خان د خلاصون، د لوړو بیو، د سون توکو بیو پر زیاتوالي او د سیاسي بندیانو د خوشې کېدو لپاره په ټول هېواد کې پراخ احتجاجونه وکړي.
دغه اعلان د پارلمان مخې ته د اپوزېسیون تر پارلماني ناستې وروسته په یوې خبري ناسته کې شوی. د ملي اسمبلۍ پخواني مشر اسد قیصر ویلي، د تحریک انصاف ګوند او د پاکستان خلک د عمران خان او د هغه د مېرمنې بشرا بيبي د روغتیا په اړه سخت اندېښمن دي.
هغه وویل، احتجاجونه به د لوړې بیې، د پټرول او ډیزلو د بیو زیاتوالي، د سیاسي بندیانو د خوشې کېدو او د بنسټیزو بشري حقونو د بېرته ټینګښت لپاره ترسره شي. اسد قیصر تور پورې کړ، چې حکومت د اپوزېسیون پر غړو سیاسي فشارونه زیات کړي او منتخب استازي له دندو ګوښه کېږي.
هغه خبرداری ورکړی، که په پارلمان کې له اپوزېسیون سره اوسنی چلند دوام وکړي؛ نو اپوزېسیون به د اسمبلۍ د عادي چارو د مخنیوي هڅه وکړي. د تحریک انصاف مشرانو راتلونکې بودجه «د بېوزلو ضد بودجه» وبلله او ویې ویل، حکومت پر خلکو د نویو مالیو لګولو ته چمتووالی نیسي؛ په داسې حال کې چې ولس له سخت اقتصادي فشار سره مخ دی.
اسد قیصر د افغانستان په اړه د پاکستان پر تګلارې هم نیوکه وکړه او ویې ویل، له افغانستان سره ډیپلوماتیکې اړیکې په سمه توګه نه اداره کېږي او د ناسمو تګلارو له امله ناامني پراخېږي.
بلخوا د پاکستان حکومت اپوزېسیون هم په جلا اعلامیه کې ویلي، چې د جمعې په ورځ به د پاکستان په ټولو ښارونو کې احتجاجي غونډې جوړې شي. د پاکستان حکومت اپوزېسیون ویلي، راتلونکې بودجه به د نړۍوال وجهي صندوق تر اغېز لاندې جوړه شي او پر خلکو به نور اقتصادي بار واچوي.
دوی د عمران خان د روغتیا په اړه هم اندېښنه څرګنده کړې او غوښتنه یې کړې، چې نوموړی دې سملاسي روغتون ته ولېږدول شي او له کورنۍ او دوستانو سره دې د ملاقات اجازه ورکړل شي.
د پاکستان حکومت اپوزېسیون د ټولو سیاسي بندیانو په ګډون د عمران خان، علي وزیر او ډاکټر ماهرنګ بلوڅ د خوشې کېدو غوښتنه هم کړې ده.
