په ننګرهار کې د طالبانو سیمهییزو چارواکو اعلان کړی، چې په جلالاباد ښار کې یې د دوو خیریه بنسټونو او دوو اتحادیو دفترونه تړلي دي. په ننګرهار کې د طالبانو د عدلیې ریاست ویلي، چې دا اقدام د یادو بنسټونو د قانوني کاري جوازونو د مودې د پای ته رسېدو له امله شوی دی.
نګرهار کې د طالبانو د عدلیې ریاست د انسجام امریت مسوولینو په یوه خبرپاڼه کې ویلي، چې دوی د جلالاباد ښار په بېلابېلو برخو کې د خیریه بنسټونو او اتحادیو د چارو نظارت ترسره کړی دی. د چارواکو په وینا، دغو بنسټونو د خپلو جوازونو د نوي کولو لپاره لازم اقدامات نه وو کړي، چې له همدې امله یې فعالیتونه ودرول شول او دفترونه یې وتړل شول.
د طالبانو د ننګرهار ولایت رسنیز دفتر په خبرپاڼه کې راغلي، چې د ننګرهار د عدلیې ریاست تل هڅه کوي چې له اړوندو بنسټونو او اتحادیو څخه منظم او دوامداره نظارت وکړي. چارواکي وایي، د دې څارنې اصلي هدف دا دی چې د خیریه ټولنو او اتحادیو چارې په اصولي او معیاري ډول پرمخ ولاړې شي.
طالب چارواکو ټینګار کړی چې د ورته نظارتونو له لارې غواړي ډاډ ترلاسه کړي، چې خلکو ته باکیفیته خدمات وړاندې کېږي. د خبرپاڼې له مخې، د ټولو خیریه ټولنو فعالیتونه باید د قانوني چوکاټ مطابق تنظیم شي، ترڅو د خدماتو په وړاندې کولو کې روڼتیا او کیفیت تضمین شي.
