د پښتونخوا د دته خېلو سیمې زرګونه کورنۍ د احتمالي پوځي عملياتو له وېرې بېکوره شوې دي
د خیبر پښتونخوا د شمالي وزيرستان د دته خېلو سیمې زرګونه کورنۍ د احتمالي پراخو امنيتي عملياتو له وېرې د خپلو مېنو پرېښودو ته اړې شوې دي. ځايي خلک وايي، له تېرو څو ورځو راهيسې په سيمه کې حالت سخت ترينګلی شوی او د کډو د بارېدو لړۍ شپه او ورځ روانه ده.
راپورونه ښيي، چې یادې سیمې ته غځېدلې مهمې لارې تړل شوې، بازارونه بند دي او خلک د خوراکي توکو، درملو او نورو لومړنيو اړتیاوو له کمښت سره مخ شوي دي. ځايي اوسېدونکي وايي، ښځې، ماشومان او سپين ږېري له ناوړه وضعیت سره مخ دي او ګڼې کورنۍ له سامان پرته په بیړه له خپلو مېنو وځي.
بل لور ته د پاکستان حکومت اړوندو سرچينو اېکسپرېس ټربیون ورځپاڼې ته ویلي، چې د وسلهوالو د احتمالي حضور له امله امنيتي تدابير سخت شوي او دغه اقدامات د ولس د خوندیتوب لپاره اړین دي.
خو ځايي خلک د مرستو د نشتوالي او په وار، وار د بېځايه کېدو له امله اندېښمن دي او له حکومته د بېړنیو بشري مرستو غوښتنه کوي.
