د ایران د بهرنیو چارو وزیر د ملګرو ملتونو امنیت شورا غونډې ته بلل شوی
د ایران د بهرنیو چارو وزارت ویلي چې د دغه هېواد د بهرنیو چارو وزیر عباس عراقچي ته د ملګرو ملتونو د امنیت شورا په راتلونکې غونډه کې د ګډون بلنه ورکړل شوې ده.
د ایران د بهرنیو چارو وزارت ویاند اسماعیل بقایي د چارشنبې په ورځ ویلي، ټاکل شوې دغه غونډه د راتلونکې سېشنبې په ورځ په نیویارک کې د نړیوالې سولې او امنیت په اړه جوړه شي.
د نوموړي په وینا، عراقچي ته دا بلنه په داسې حال کې ورکړل شوې چې چین د روانې میاشتې لپاره د ملګرو ملتونو د امنیت شورا مشري پر غاړه لري.
تر اوسه په غونډه کې د عباس عراقچي د ګډون یا نه ګډون په اړه وروستۍ پرېکړه نه ده شوې.
