سهیل اپریدي ته یو وار بیا په اسلاماباد کې له عمران خان سره د ملاقات اجازه نهده ورکړل شوې
د اسلاماباد پولیسو یو وار بیا د سېشنبې په ورځ (د غویي ۲۹مه) هغه مهال اډیاله زندان ته د خېبر پښتونخوا د سر وزیر سهیل اپریدي د ننوتو مخه نیولې، چې غوښتل یې د تحریک انصاف ګوند بنسټګر او د پاکستان له پخواني لومړي وزیر عمران خان سره وګوري.
هغه د عمران خان له خویندو او د تحریک انصاف یوشمېر مشرانو سره یو ځای د نوموړي لیدو ته روان و؛ خو پولیسو د اسلاماباد په چونګي نمبر ۲۶ سیمه کې د هغه کاروان ودراوه. وروسته د یاد ګوند پلویانو هلته احتجاجي ناسته هم وکړه.
وروسته د پاکستان تحریک انصاف ګوند عمومي منشي سلمان اکرم راجا، بیرسټر ګوهر علي خان او د بشرا بيبي لوڼې هم اډیاله زندان ته ورسېدې؛ خو هغوی ته هم د ملاقات اجازه ورنه کړل شوه. سهیل اپریدي ویلي، دغه ډول چلند له جمهوري اصولو سره په ټکر کې دی او د فدرالي یووالي پر وړاندې تبعیضي چلند ښيي.
په همدې حال کې د اډیاله زندان سرچینو ویلي، د عمران خان طبي معاینه هم شوې او ډاکټرانو یې د سترګې او عمومي روغتیايي وضعیت ارزولی دی.
له بل پلوه تحریک انصاف ګوند او د پاکستان حکومت اپوزېسیون اعلان کړی، چې د جمعې په ورځ به د عمران خان د خلاصون، د لوړو بیو، د سون توکو بیو پر زیاتوالي او د سیاسي بندیانو د خوشې کېدو لپاره په ټول هېواد کې پراخ احتجاجونه وکړي.
