په پاکستان کې د روسیې سفیر البرټ پي خیروف ویلي، د افغانستان او پاکستان ترمنځ روانې ترینګلتیا نه یوازې سیمهییزه سوداګري زیانمنه کړې؛ بلکې مهمې اقتصادي او د انرژۍ پروژې یې هم له ځنډ سره مخامخ کړې دي.
هغه دغه څرګندونې د دوشنبې په ورځ په اسلاماباد کې د روسیې سفارت په یوې خبري غونډه کې کړې دي. نوموړي ویلي، د کابل او اسلاماباد ترمنځ کړکېچ په ځانګړي ډول د درملو د سوداګرۍ پر بهیر منفي اغېز کړی او ګڼې سیمهییزې پروژې یې هم ټکنۍ کړې دي.
د هغه په وینا؛ له ځنډ سره مخ پروژو کې ټرانس افغان رېل پټلۍ، کاسا-۱۰۰۰ او ټاپي شاملې دي.
روسي سفیر زیاته کړه، که طالبان او پاکستان وغواړي؛ نو روسیه چمتو ده چې د دواړو هېوادونو ترمنځ د منځګړیتوب رول ولوبوي.
د اسلاماباد او طالبانو ترمنځ د زیاتېدونکو سیاسي او امنیتي ترینګلتیاوو په دوام سره د پاکستان لومړي وزیر شهباز شریف تازه ویلي، چې د طالبانو پر ضد د «غضبللحق» په نوم پوځي عملیات به په بشپړ قاطعیت دوام ولري.
شهباز شریف د بلوچستان ایالت په کویټې ښار کې په یوه پوځي پوهنتون کې د وینا پرمهال ویلي، پاکستان به د هغو وسلهوالو ډلو پرضد خپل عملیات روان وساتي چې په افغانستان کې فعالیت کوي او د پاکستان امنیت ته ګواښ پېښوي.
