د خیبر پښتونخوا په شانګله کې د کان کېندنې پرمهال دوه کان کېندونکي مړه او بل ټپي شوی دی
د خیبر پښتونخوا په شانګله ولسوالۍ کې په دوو جلا پېښو کې دوه کان کېندونکي مړه او یو بل ټپي شوی دی. لومړۍ پېښه د اخوروال د سکرو کانونو په پنځم کان کې هغه مهال رامنځته شوه، کله چې دوه کان کېندونکي د کان دننه د کار پرمهال د خاورو او ډبرو لاندې بند پاتې شول.
ځايي چارواکو ویلي، ژغورنې ډلې، نور کانکېندونکي او د سیمې اوسېدونکي سملاسي د ژغورنې لپاره ورغلل او له څه باندې دوو ساعتونو هڅو وروسته یې دواړه کان کېندونکي را واېستل. په یاده پېښه کې یو کان کېندونکی مړ او یو بل ټپي شوی دی.
په دویمه پېښه کې چې د چپرمشتي په سیمه کې شوې، یو کان کېندونکی پهکې مړ شوی دی.
