د بشري حقونو کمېسیون: د فریدالله اپریدي جبري نادرکه کول «ناقانونه او غیرانساني» کړنه ده
د پاکستان د بشري حقونو کمېسیون د دغه هېواد له فدرالي حکومت او د خیبر پښتونخوا له ځایي ادارې غوښتي، چې د پښتون ژغورنې غورځنګ فعال فریدالله اپریدي د ژر تر ژره موندلو لپاره اړین ګامونه پورته کړي. فریدالله اپریدی څلور ورځې وړاندې په پېښور کې نادرکه شوی.
دغه کمېسیون ویلي، چې اپریدی یوازې نهدی؛ بلکې د یاد غورځنګ دوه نور فعالان حنیف پښتین او نورالله ترین هم د ۲۰۲۵کال له نومبر میاشتې راهیسې نادرکه دي او د هغوی په اړه هېڅ ډول معلومات نهشته.
د بشري حقونو کمېسیون ټینګار کړی، چې دغه درې واړه فعالان باید ژر تر ژره محکمې ته وړاندې کړل شي او د هغوي د برخلیک په اړه روښانه معلومات ورکړل شي. یاد کمېسیون ویلي، چې جبري نادرکه کول او خپلسرې نیونې د قانون خلاف او غیرانساني کړنې دي او باید ژر تر ژره پای ته ورسېږي.
تر دې وړاندې د پښتون ژغورنې غورځنګ د یوې اعلامیې په خپرولو سره د خپل فعال غړي فرید اپریدي د سملاسي او بې قید و شرطه خوشې کېدو غوښتنه کړې وه. دغه غورځنګ خبرداری ورکړی و، که نوموړی ژر خوشې نهشي، په ټوله نړۍ کې به پراخ لاریونونه او سولهییز ولسي کمپاینونه پیل کړي.
په اعلامیه کې راغلي و، چې د فرید اپریدي د ژوند او امنیت بشپړ مسوولیت د پاکستان پر ریاستي ادارو دی.
