د طالبانو د ارشاد، حج او اوقافو وزارت خبر ورکړی، چې سعودي عربستان ته د افغان حاجیانو د لېږد بهیر پرون چهارشنبه (د غویي ۳۰مه) بشپړ شو. د یاد وزارت په وینا؛ سږکال ټول ٣٠زره افغان حاجیان د اریانا افغان او کام ایر هوايي شرکتونو په ٩٧ الوتنو کې سعودي عربستان ته لېږدول شوي دي.
د طالبانو د ارشاد، حج او اوقافو وزارت لهخوا په خپرې شوې خبرپاڼه کې راغلي، چې په لومړي پړاو کې نږدې ١٥زره حاجیان مدینې منورې او په دويم پړاو کې تر ١٥زره ډېر مکې معظمې ته لېږدول شوي چې دا مهال ټول په مکه معظمه کې حضور لري.
په خبرپاڼه کې راغلي، چې د حاجیانو د خدمت، لارښوونې، روغتیايي اسانتیاوو او لازمې همغږۍ په موخه به خپلې هڅې لا ګړندۍ کړي او د حج مراسمو له بشپړېدو وروسته به د حاجیانو د بېرته راستنېدو بهیر هم په منظم او خوندي ډول ترسره کړي.
وړاندې یوشمېر افغان حاجیانو چې د حج فریضې ادا کولو لپاره سعودي عربستان ته تللي په یوې خپرې شوې ویډیو کې ویلي و، چې د اسانتیاوو له نشتوالي سره مخ دي او کمزوري خدمتونه ورته وړاندې کېږي. د هغوی په وینا؛ سره له دې چې طالبانو ترې لوړ لګښتونه اخیستي؛ خو لازم خدمات ورته نهدي برابر شوي.
