په جوزجان کې د طالبانو والي عبدالله سرحدي په یوې غونډه کې ویلي، چې په دغه ولایت کې د غصب شویو ځمکو د تثبیت او استرداد کمېټې له یو مېلیون څخه ډېره ځمکه د طالبانو د مرکزي کمېسیون له پرېکړې وروسته د دولتي ملکیت په توګه تثبیت کړې ده.
هغه دارنګه د ځمکو د تثبیت بهیر کې پر روڼتیا، د اصولو او مقرراتو پر مراعتولو، امانتدارۍ او د هر ډول تعصب او تبعیضي چلند پر مخنیوي ټینګار کړی. هغه د کمېټې له غړو وغوښتل، چې خپلې دندې په دقت، روڼتیا او مسوولیت پالنې سره ترسره کړي.
په ورته وخت کې د یادې کمېټې منشي فېروز احمد عثماني د یادو ځمکو په اړه وویل: «تر اوسه یو مېلیون ۱۲۲زره او ۲۶۷ جریبه ځمکه تر تثبیت او تشخیص وروسته د مرکزي کمېسیون د وروستۍ پرېکړې له مخې د دولتي ملکیت په توګه ثبت شوې ده».
د نوموړي په وینا؛ له ۱۰۴زره او ۴۷۷ جریبه نوره ځمکه هم د جوزجان په مرکز او ولسوالیو کې تثبیت شوې او دوسیې یې د نورو اجرااتو لپاره مرکزي کمېسیون ته سپارل شوې دي. هغه زیاته کړه، چې ۵۳زره او ۴۰۲ جریبه نوره ځمکه لاهم تر ارزونې او څېړنې لاندې ده.
خو د بېلابېلو ولایتونو ځینو اوسېدونکو تر دې وړاندې افغانستان انټرنشنل- پښتو ته ویلي و، چې طالبانو د ځینو خلکو شخصي ځمکې دولتي اعلان کړې دي.
