په جاپان کې د هرو درېیو شرکتونو له ډلې یو یې ځیرک روبوټونه کاروي
د یوې تازه سروې له مخې؛ د جاپان د شاوخوا هرو درېیو شرکتونو له ډلې یو یې د مصنوعي ځیرکتیا لرونکي روبوټونه کاروي یا د کارولو پلان لري. د موټر جوړونې او ترانسپورتي تجهیزاتو شرکتونه په دې برخه کې تر ټولو مخکې دي.
د جاپان حکومت وایي، دغه ځیرک روبوټونه به د کارکوونکو د کمښت ستونزه راکمه کړي او د صنعتي ټېکنالوژۍ په برخه کې به د جاپان دریځ نور هم پیاوړی کړي. د سروې له مخې؛ ۴ سلنه شرکتونه لا دمخه دغه روبوټونه کاروي، ۵ سلنه د کارولو پلان لري او ۲۵ سلنه یې د کارولو په اړه غور کوي.
ګڼ شرکتونه دغه روبوټونه د تولیدي چارو، له ګواښه ډکو کارونو او د پېرېدونکو خدمتونو لپاره ګټور بولي.
