امریکا د یوه هندي چې د ۲ کسانو پر وژنې تورن دی د نیونې لپاره ۵۰ زره ډالره جایزه اعلان کړه
د امریکا د تحقیقاتو فدرالي ادارې (اېفبيای) د نذیر حمید په نوم د یوه هندي د نیونې په تړاو د معلوماتو په بدل کې د ۵۰ زره امریکاي ډالرو جایزه اعلان کړه. پر دغه کس تور دی چې په ۲۰۱۷ کال کې یې د امریکا په نیوجرسي کې یوه مور له زوی سره وژلې ده.
د امریکا د تحقیقاتو فدرالي ادارې یا اېفبيای د چهارشنبې په ورځ (د غويي ۳۰مه) د یوې اعلامیې په خپرولو سره ویلي، نذیر حمید د ۲۰۱۷ کال د مارچ د ۲۳مې په ماښام د نیوجرسي په مېپلشېډ سیمه کې یوه مور له ۶ کلن زوی سره وژلی دی.
داعلامیې لهمخې، یاد کس له دغې پېښې وروسته د ۲۰۱۷ کال د سپټمبر پر لومړۍ نېټه له امریکا څخه وتلی او اوس په هند کې دی. یادې ادارې د هر ډول هغه معلوماتو چې د هغه د نیونې لامل شي د ۵۰ زره امریکايي ډالرو جایزه اعلان کړې ده.
امریکايي محکمو پر یاد کس له قتل تور سربېره، د ناقانونه موخې لپاره د وسلې ساتنې او له محاکمې څخه د تېښتې تورونه لګولي دي.
یادې ادارې ویلي: «دا معلومه شوې ده، چې حمید په هند کې ژوند کوي».
