د ملالې بنسټ، چې د نجونو د زدهکړې له حق څخه د دفاع برخه کې فعالیت کوي، د طالبانو لهخوا د زوجین د تفریق پر اصولنامې نیوکه کړي او ویلي یې دي، دا اصولنامه افغانستان کې د ښځو پر وړاندې د سیستماتیک جنسیتي تبعیض نښه ده. دغه بنسټ د کمر عمره نجونو ودول د ښځو او نجونو د حقونو نقض وباله.
د ملالې بنسټ د جمعې په ورځ (د غبرګولي لومړۍ) په خپله اېکسپاڼه په همدې تړاو د یوناما د اعلامیې په بیا خپرولو سره، د طالبانو لهخوا د ښځو پر زدهکړو، کار او د هغوی د خپلواکۍ پر سلبولو د لګول شویو پرله پسې محدودیتونو لړۍ ته اشاره کړې او همداراز یې خبرداری ورکړی، د دې ډلې نوی فرمان چې پر بنسټ یې «د نجونو چوپتیا د واده لپاره د رضایت په معنا» ګڼل کېږي، د ښځو پر ژوند د بشپړې واکمنۍ د قانوني کولو په لور یو بل ګام دی.
تر دې وړاندې یوناما ویلي وو، چې د طالبانو لهخوا د مېړه او مېرمنې د جلاوالي اصولنامه د کم عمره نجونو واده ته اجازه ورکوي او «د ښځو او نجونو د حقونو د لهمنځه وړلو په لاره کې د یو بل ګام ښکارندويي کوي».
د ملالې بنسټ لیکلي: «کله چې حذف کول او تبعیض په قانون کې ولیکل شي، نو دا بيا یوازې د حقونو نقض نهدی، بلکې پر یوه سیستماتیکه او بنسټیزه شوې واکمنۍ بدلېږي».
طالبانو په دې وروستیو کې د «زوجینو د تفریق اصول» په نوم یوه ۳۱مخیزه اصولنامه توشېح کړې، چې د کورنۍ د قوانینو په اډانه کې د ماشومانو د واده موضوع، د نکاح د فسخ کولو شرایط او د ماشومانو د ساتنې اړوند حکمونه په تفصیل سره څېړي.
د دې اصولنامې توشېح کېدل له پراخو غبرګونونو سره مل وو. د ملګرو ملتونو د ښځو برخې هم د جمعې په ورځ وویل، چې دا فرمان د افغان ښځو او نجونو حقونه کمزوري کوي او د مېړه او مېرمنې جلاوالی ستونزمنوي.
د طالبانو ۱۸م نمبر فرمان د نجونو د حقونو په اړه جدي اندېښنې راپارولې دي. یوناما وايي، چې دا فرمان د نجونو په جلا کولو سره، په ځانګړې توګه تر بلوغ او واده وروسته، کولای شي د کم عمره نجونو د ودولو لپاره لاره هواره کړي او حتی تر بلوغ وروسته د نجلۍ چوپتیا د واده لپاره د هغې د رضایت په توګه تعبیر کړي.
