د قزاقستان د کرنې وزارت او د اوسپنې پټلۍ ادارې ویلي، دغه هېواد د ۲۰۲۵ کال له سپټمبر څخه د ۲۰۲۶ کال د مي تر ۲۰مې نېټې پورې افغانستان ته ۱۱،۷ میلیونه ټنه غنم او اوړه صادر کړې دي. قزاقستان ویلي، چې د پخوا پرتله افغانستان ته د اوړو او خوراکي توکو صادرات ۲،۳ برابره زیات شوې دي.
د قزاقستان د اوسپنې پټلۍ ادارې د شمېرو پر بنسټ، افغانستان ته د غنمو او اوړو د صادراتو دغه کچه د تېر کال د همدې مودې په پرتله ۱۳،۶ سلنه لوړه شوې ده، چې تېر کال ۱۰،۳ میلیونه ټنه وه.
راپور زیاتوي چې ازبکستان ته هم د دغه هېواد صادراتو کچه ۳۹،۵ سلنه زیات شوي، چې له ۳،۵ میلیونه ټنو څخه ۴،۸ میلیونه ټنو ته رسېدلي دي.
د یاد هېواد صادرات قرغزستان ته هم ۱،۵ برابره لوړ شوي، چې له ۲۹۷ زره ټنو څخه ۴۵۷ زره ټنو ته رسېدلي دي.
همداراز راپور کې راغلې افغانستان ته د اوړو او خوراکي توکو لېږد ۲.،۳ برابره زیات شوی، چې له ۱،۳ میلیونه ټنو څخه ۳ میلیونه ټنو ته رسېدلی دی.
د قزاقستان چارواکو ویلي، دا مثبت بدلون د قزاقستاني اوړو او خوراکي توکو پر وړاندې د بهرني غوښتونکو زیاتوالی، د صادراتو د لوجستیکي اسانتیاوو ښه والی، او له نړیوالو شریکانو سره د سوداګریزو او اقتصادي همکاریو پراختیا ښيي.
وروسته له هغې چې د پاکستان او طالبانو ترمنځ اړیکې ترینګلې شوې او څو او سوداګریزې لارې په ټپه وتړل وشوې، طالبانو هڅه وکړه چې د لومړنیو اړتیاوو او سوداګریزو توکو لپاره بدیلې لارې ومومي او طالبانو د ایران، ازبکستان او قزاقستان له بازارونو او ترانزیټي لارو سره خپلې سوداګریزې اړیکې پراخې کړې دي.
د راپورونو له مخې، د پاکستان ـ افغانستان سوداګري صفر کچې ته راکمه شوې، خو د مرکزي اسیا هېوادونو سره سوداګریزه همکاري زیاته شوې، چې دا بدلون د افغانستان د سوداګریزو لارو د تنوع ښکارندویي کوي.
