نبیل: د بلوڅو وسلهوال خوځښت کې د ښځو راڅرګندېدل د مبارزې په روایت کې نوی بدلون دی
د جمهوري نظام پر مهال د افغانستان د ملي امنیت رییس رحمت الله نبیل ویلي چې د بلوڅو وسلهوال خوځښت په پیغامونو او تبلیغاتي روایتونو کې د ښځو راڅرګندېدل د دې خوځښت په سمبولیک، ټولنیز او تبلیغاتي جوړښت کې د پام وړ بدلون څرګندوي.
رحمت الله نبیل په خپله اېکس پاڼه کې د بلوڅو د وسلهوال خوځښت د وروستیو پرمختګونو په اړه تبصره کړې او دا یې «د پام وړ تحول» بللی دی.
هغه لیکلي: «له چوپتیا تر مقاومت پورې، د بلوڅو ښځو راڅرګندېدل د وسلهوالو بېلتونپالو پیغامونو په ډګر کې د بلوڅو د پاڅون په سمبولیک، روایتي او ټولنیز نفوذ کې د پام وړ بدلون څرګندوي.»
د نبیل څرګندونې وروسته له هغې رامخته شوې، چې د بلوڅو اړوند یوې رسنیزې پاڼې ویډيوي راپور خپور کړ، چې د بلوڅ ازادي غوښتونکي پوځ اړوند ښځینه قومندانې شېناز بلوچ پکې د ښځينه ټولي روزنه کوي.
د شېناز بلوچ په خپره شوې ویډیو کې د بلوڅو نجونو د وسلهوالې روزنې صحنې هم ښودل شوي دي. نوموړې په دغه ویديو کې ادعا کړې چې پر بلوڅو «جبر او فشار» روان دی او بلوڅان یې «محکوم» بللي دي. د راپور له مخې هغې همدارنګه پر هغو هېوادونو نیوکه کړې چې د بلوڅو د وسلهوالو خوځښتونو په اړه منفي دریځ یا تبلیغات کوي.
په راپور کې دا د بلوڅو د وسلهوال خوځښت په رسنیز او تبلیغاتي حضور کې د ښځو د لومړي ښکاره حضور په توګه یاد شوی، خو د دغو ادعاوو او د ویډیو د محتوا په اړه لا خپلواکو سرچینو جلا تایید نه دی کړی.
