د مقاومت جبهې مشر احمد مسعود ویلي، د اروپايي پارلمان له هغو غړو منندوی دی، چې د افغانستان د خلکو له حقونو ملاتړ کوي او له طالبانو سره د اړیکو د عادي کېدو پر ضد روښانه دریځ لري. اروپايي پارلمان په یوه پرېکړهلیک کې د طالبانو پر لوړپوړو چارواکو د بندیزونو پر پراخولو ټينګار کړی دی.
احمد مسعود د جمعې په ماخوستن (د غبرګولي لومړۍ) په خپله اېکسپاڼه ویلي، چې اروپا باید د بشري حقونو، ولسواکۍ، د انسان کرامت او د قانون حاکمیت ارزښتونه وساتي او په وینا یې، دا ارزښتونه باید د «عملپالنې» یا له «یوه ترهګر رژیم» سره د نرمښت په نوم قرباني نهشي. هغه زیاته کړه، چې اروپا دې د افغانستان له ازاديغوښتونکو خلکو سره ودرېږي، نه له «ترهګرو او ظالمانو» سره چې دوی ځوروي.
د مقاومت جبهې مشر زیاته کړې، چې اروپا باید هغو اصولو ته ژمنه پاتې شي، چې له کلونو راهیسې یې د دفاع ادعا کوي؛ لکه د بشري حقونو ملاتړ، ولسواکي، د انسان وقار او د قانون حاکمیت.
مسعود له طالبانو سره د اړیکو د «عادي کېدو» مخالفت تکرار کړی او د اروپایي پارلمان د هغو غړو ستاینه یې کړې، چې د افغانستان د خلکو د حقونو په دفاع کې یې روښانه دریځ څرګند کړی دی. ده له نړیوالو وغوښتل چې د اصولو پر بنسټ تعامل ته دوام ورکړي.
د اروپايي پارلمان غړو د تېرې پنجشنبې په ورځ (د غويي ۳۱مه) د افغانستان د بشري حقونو د وضعیت په اړه یو پرېکړهلیک تصویب کړ او په دې پرېکړه لیک کې یې له اروپايي ټولنې غوښتي چې د طالبانو پر لوړپوړو چارواکو بندیزونه لاپسې جدي او پراخ کړي.
یاد پرېکړهلیک په ۴۸۰ موافقو، ۵ مخالفو او ۸۳ ممتنعو رایو سره تصویب شوی دی.
