د پاکستان د بشري حقونو کمېسیون کشمير کې د ګډې ولسي کمېټې په ناقانونه ګرځولو اندېښنه وښوده
د پاکستان د بشري حقونو کمېسیون د دغه هېواد تر ولکې لاندې کشمير کې د ولسي ګډې کاري کمېټې په ناقانونه ګرځولو ژوره اندېښنه څرګنده کړې ده. د کشمير حکومت د جمعې په ورځ ياده کاري کمېټه يوه ناقانونه ډله اعلان کړه.
د کشمير حکومت دغه ګام په داسې حال کې پورته کړی، چې یادې ولسي ګډې کاري کمېټې د جون پر نهمه د دوی په وينا، د خپلو حقونو لپاره کاربنديز او لاريون اعلان کړی دی.
د پاکستان د بشري حقونو کمېسیون د شنبې په ورځ (د غبرګولي ۱۶مه) د یوې اعلامیې په خپرولو سره ویلي: «د داسې یوې ډلې پر وړاندې د ترهګرۍ ضد قوانینو کارول چې د سیاسي، ټولنیزو او اقتصادي غوښتنو په شاوخوا کې یې خلک راټول کړي وو او د عمومي لاریون غږ یې کړی وو، د سولهییزې راټولېدنې او مخالفت لپاره د فضا د تنګېدو په اړه جدي اندېښنې راپورته کوي».
دغه کمېسیون زياته کړې، دغه ډول چارې په داسې وخت کې دي، چې په جولای کې د پاکستان تر ولکې لاندې کشمیر کې ټاکنې کېږي او په وینا یې: «دا په ځانګړي ډول مهمه ده چې د بیان، ټولنې او سولهییزې راټولېدنې د حقونو په ګډون بنسټیزې ازادۍ په بشپړه توګه خوندي شي».
د راپورونو لهمخې، په کشمیر کې د ولسي ګډې کاري کمېټې د غړو په ګډون ۷۲ کسان د پوليسو لخوا نيول شوي دي. يادې کمېټې تېره شپه ناوخته ويلي وو، چې د پوليسو په ډزو کې یې يو غړی هم وژل شوی دی.
د کشمير حکومت ويلي، هېچا ته به اجازه ور نهکړي چې قانون تر پښو لاندې کړي.
په کشمیر کې د ولسي ګډې کاري کمېټې په خپله اېکسپاڼه لیکلي، د کشمير په راولاکوټ علاقه کې یې د پوځي روغتون پر وړاندې اعتراضي پرلت اعلان کړی او زياته کړې یې ده، چې د جون په نهمه اعلان شوی لاريون به په خپل ټاکلي وخت ترسره شي.
