یوناما د کډوالو د نړیوالې ورځې په مناسبت په یوې خبرپاڼه کې اعلان کړی، چې په ټوله نړۍ کې ۴۶،۱ میلیونه خلک د تاوتریخوالي، جګړو او ځورونو له امله د خپلو کورونو پرېښودو ته اړ شوي دي. دغه سازمان زیاتوي، افغانستان بیا په نړۍ کې د بېځایه کېدو له یو تر ټولو ستر او جدي کړکېچ سره مخ دی.
په افغانستان کې د ملګرو ملتونو مرستندوی دفتر (یوناما) د جمعې په ورځ (د غبرګولي ۲۹مه) د یوې خبرپاڼې په خپرولو سره ټینګار کړی، چې د دغو ارقامو د هرې شمېرې تر شا یو داسې انسان شته، چې له تاوتریخوالي او جګړو تښتېدلی دی. د دغه نړیوال سازمان د معلوماتو له مخې، په هېواد کې دننه او په ټوله سیمه کې بېځایه شوي افغانان د خوندیتوب او د خپل ژوند د بیا جوړولو په لټه کې دي.
د یوناما د راپور پر بنسټ، یوازې په ۲۰۲۵ کال کې له ۲،۹ میلیونو څخه ډېر افغان کډوال بېرته خپل هېواد ته ستانه شوي دي. خبرپاڼه کاږي، چې د دغو راستنو شویو کډوالو ډېره برخه تر سخت فشار لاندې هېواد ته ستانه کړل شوي او اوسمهال په خورا سخت وضعیت کې ژوند تېروي.
د ملګرو ملتونو دغه بنسټ زیاته کړې، که څه هم ډېری افغان کډوال غواړي خپل هېواد ته بېرته ستانه شي، خو د هغوی د بېرته ستنېدو پروسه باید په خپله خوښه، په خوندي توګه او په درنښت سره ترسره شي.
بل خوا، د کاریتاس نړیوالې خیریه موسسې د کډوالو د نړیوالې ورځې په درشل کې په خپل نوي راپور کې ویلي، چې افغانستان په نړۍ کې د کډوالو د وتلو د اوو اصلي هېوادونو په ډله کې ځای لري. د دغه مرستندویه سازمان په وینا، په میلیونونو افغانان د اوږدمهاله جګړو، تاوتریخوالي او سختو بحرانونو له امله د خپلو کورونو پرېښودو ته اړ شوي دي.
د ملګرو ملتونو د کډوالو عالي کمېشنرۍ بیا ویلي، چې د ۲۰۲۳ کال له وروستیو میاشتو راهیسې تر ۶ مېلیونه ډېر افغانان خپل هېواد ته ستانه شوي دي. د یاد سازمان په وینا؛ له دې ډلې نیمایي یې له کلونو جلاوطنۍ وروسته خپل هېواد ته ستانه شوي، چې ان د افغانستان اړوند اسناد هم نهلري.
