شېراحمد حقاني: افغانان له بمونو سره عادت دي، پاکستان موږ نه‌شي تسلیمولای

حقاني په کاپیسا ولایت کې یوه غونډې ته د وینا پرمهال پاکستان د افغانستان دښمن وباله او ویې ویل: «پاکستانه! ته څوک یې چې موږ ستا فشار ته تسلیم شو؟ افغانان له بمونو سره عادت دي، موږ د نړۍ ستر قدرتونه نه یو تسلیم کړي، ته څوک یې؟»
هغه ادعا وکړه، چې افغانستان متحد دی خو په پاکستان کې دغه ډول یووالی نه‌شته. نوموړي زیاته کړه، چې هېڅ ظلم به بې‌ځوابه پاتې نه‌شي. هغه ویلي، له بمباریو وېره نه‌لري او داسې یو هېواد یې مات کړی چې تر پاکستان ډېر په عصري وسلو او ټېکنالوژۍ سمبال و.
حقاني همداراز ادعا وکړه، چې پاکستان به د خپلو ناسمو سیاستونو له امله له تجزیې سره مخ شي. د طالبانو د اطلاعاتو او کلتور وزیر دغه څرګندونې په داسې حال کې کړې، چې په وروستیو ورځو کې د افغانستان او پاکستان ترمنځ لفظي ناندرۍ او امنیتي کړکېچ زیات شوی دی.