د افغان ډراګنز په نوم د هېکرانو یوې ډلې ادعا کړې، چې د طالبانو د دفاع وزارت وېبپاڼه یې له کاره غورځولې ده. دغه ګروپ افغانستان اینترنشنل ته ویلي، دا کار یې په افغانستان کې د اعتراض کوونکو د ځپلو او په ځانګړې توګه په هرات کې د ښځو د نیولو په غبرګون کې کړی دی.
دمګړی د دفاع وزارت وېبپاڼه نه خلاصېږي او دغه وزارت د دې موضوع په اړه څه سپیناوی نه دی ورکړی.
د افغان ډراګنز هېکرا ډله وایي چې په افغانستان کې سایبري بریدونو ته لېوالتیا نه لري، خو د طالبانو د سیاستونو له امله مجبوره شوې چې دغه ډول اعتراضي اقدام وکړي.
طالبانو په تېره یوه میاشت کې په وار وار په هرات کې ښځې نیولې دي. همدارنګه دغې ډلې د ښځو د ځورونې په وړاندې د هرات د اوسېدونکو سوله ییز لاریون وځاپه چې له پراخو ملي او نړیوالو غبرګونونو سره مخ شو.
د افغان ډراګنز هېکرانو ډلې تېر کال هم د سایبري بریدونو په کولو سره د طالبانو د ادارې د نږدې ټولو وزارتونو وېبپاڼې له کاره غورځولې وې.
په تېرو کلونو کې، د «طالبلیکس» په نوم یوې بلې هکري ډلې د طالبانو تر کنټرول لاندې د دولتي ادارو د معلوماتو بانک په نښه کړی و او د لسګونو وزارتونو او نورو بنسټونو سندونه یې په انټرنیټ کې خپاره کړي وو.
