د بلوچستان د ازادۍ پوځ (BLA) د جمعې په ماښام (د چنګاښ ۱۲مه) په خپره کړې خبرپاڼه کې ادعا کړې، چې د بلوچستان د ګوادر ولسوالۍ په جیواني سیمه کې یې د پاکستان د ساحلي ځواکونو پر یوې اډې په برید کې له ۳۰ څخه ډېر سرتېري وژلي او لسګونه نور یې ټپیان کړي دي.
د پاکستان پوځ تر اوسه د دغې ادعا په اړه رسمي غبرګون نهدی ښودلی.
د خبرپاڼې له مخې، دا برید د جمعې په ماښام د «مجید لوا» په نوم د دې ډلې د ځانمرګو بریدګرو څانګې ترسره کړی دی.
د پاکستان ضد دې وسلهوالې ډلې ادعا کړې، چې د عطاالله بلوچ مشهور په «اجمل» نومي ځانمرګي بریدګر له چاودېدونکو توکو ډک موټر په ځايي وخت د ماښام په ۶:۳۲ دقیقو د پاکستان د ساحلي ځواکونو اډې ته ننوېست، چې له امله یې یوه ستره چاودنه وشوه.
د بلوچستان د ازادۍ پوځ ویاند جیهند بلوچ ادعا کړې، چې دې چاودنې د ساحلي ځواکونو اډه «په بشپړه توګه ویجاړه» کړې ده. د دې ډلې رسنیزې څانګې هم ۴۳ ثانیهيي ویډیو خپره کړې او پهکې اډې ته د موټر بم د ننوتلو او د چاودنې شېبې ښکاري.
دې ډلې همدارنګه ادعا کړې، چې له چاودنې سمدستي وروسته یې وسلهوالو له څو لورو پر اډې برید وکړ.
د بلوچستان د ازادۍ پوځ ادعا کوي، چې په دې عملیاتو کې د پاکستان د ساحلي ځواکونو څه باندې ۳۰ عسکر وژل شوي او لسګونه نور ټپیان شوي دي. د ډلې ویاند دا هم ویلي، چې د ټپیانو د سخت وضعیت او هغو کسانو له امله چې تر کنډوالو لاندې پاتې دي، ښايي د مرګژوبلې شمېر تر دې هم لوړ شي.
د بلوچستان د ازادۍ پوځ په ډاګه کړې، چې د دې عملیاتو نور جزییات به وروسته خپاره کړي. دغې ډلې زیاته کړې، چې د پاکستان د امنیتي ځواکونو پر ضد به خپلې وسلهوالې حملې تر هغه وخته روانې وساتي، څو د دوی په وینا «د بلوچستان بشپړه خپلواکي» ترلاسه شي. بلخوا ځايي پاکستاني پولیسو ویلي، چې دې ځانمرګي موټر بم برید کې یوازې د ساحلي ځواکونو درې سرتېري او د پوځ یو سرتېری وژل شوي او ۱۶ نور ټپيان شوي دي.
د پاکستان پوځ او نورو چارواکو تر اوسه د بلوڅ بېلتون پالو د ادعا شوې مرګژوبلې په اړه څه نه دي ویلي.
