د مقاومت جبهې د سیاسي دفتر رییس عبدالله خنجاني وایي، عبدالرشید دوستم او محمد محقق په تېرو پنځو کلونو کې د دغې جبهې د مشر احمد مسعود اصلي متحدین او نږدې همکاران پاتې شوي دي. هغه ټینګار کړی، چې د دغو مشرانو ترمنځ همکاري د ګډو اهدافو پر بنسټ ولاړه ده.
عبدالله خنجاني د جمعې په ورځ (د چنګاښ ۱۲مه) په خپله اېکسپاڼه کې لیکلي، چې د دغې پنځه کلنې نږدې ملګرتیا او همکارۍ بنسټ د خدای تعالی رضا، د افغانستان د خلکو ګټې او د دوی ترمنځ ګډه مبارزه جوړوي. د نوموړي په وینا، دغه مشران د جبهې له مشرتابه سره په همغږۍ خپل کار ته دوام ورکوي.
د مقاومت جبهې دغه څرګندونې داسې مهال کېږي، چې په دې وروستیو کې د طالبانو د مخالفو جبهو او سیاسي جریانونو ترمنځ د همغږۍ او یووالي د څرنګوالي په اړه بېلابېل بحثونه راپورته شوي دي. خنجاني د دغه پوسټ له لارې د خپلو متحدینو ترمنځ پر یووالي او دوامداره ملګرتیا ټینګار کړی دی.
د دغو څرګندونو په دوام، د افغانستان د مقاومت جبهې د سیاسي دفتر ريیس د دغو مشرانو ترمنځ پر ګډې مبارزې ټینګار کړی او هغه یې د هېواد د اوسني وضعیت پر لور یو مهم ګام بللی دی. د هغه په وینا، دغه اتحاد د خلکو د حقونو د خوندیتوب لپاره رامنځته شوی دی.
له بلې خوا، په تهران کې د وژل شوي رهبر علي خامنهيي د جنازې په مراسمو کې د طالبانو او د هغوی د مخالفو سیاسي جریانونو د یو شمېر استازو هممهاله ګډون په رسنیو کې پراخ غبرګونونه پارولي دي.
په ورته وخت کې، د افغانستان د ژغورنې لپاره د مقاومت د ملي شورا ویاند حسین یاسا ویلي، چې په تهران کې د طالبانو او د هغوی د مخالفو مشرانو ترمنځ هېڅ ډول لیدنه نهده پلان شوې او داسې کومه ناسته به ترسره نهشي.
