د افغانستان د پخواني ولسمشر محمد اشرف غني سلاکار وحید عمر وايي، د پاکستان له لوري د افغانستان پر خاوره بریدونو او په بدخشان کې وروستیو تحولاتو د طالبانو د ادارې د ثبات او امنیت انځور له جدي ننګونو سره مخ کړی دی.
دغه پخواني افغان چارواکي د شنبې په ورځ (د چنګاښ په ۱۳مه)، په خپله فېسبوکپاڼه کې په خپره شوې شننه کې لیکلي، چې د طالبانو اداره به په راتلونکو میاشتو کې له ناڅاپي او مخ پر زیاتېدو فشارونو سره مخامخ شي.
وحید عمر باور لري، چې د ایران او طالبانو ترمنځ همکاري تر ډېره د تهران او واشنګټن د تقابل په چوکاټ کې رامنځته شوې او که د ایران او امریکا ترمنځ د مستقیمې نښتې احتمال کم شي، نو له طالبانو سره به د تهران اړیکې هم سړې شي.
هغه لیکلي: «ایران ځان د سیمې د شیعهګانو او فارسيژبو ملاتړی بولي او د داسې نظام یو اړخیز ملاتړ چې د ډېرو په باور دواړه ډلې یې څنډې ته کړې دي، د تهران له اوږدمهالو ګټو سره سمون نهلري».
وحید عمر زیاته کړې، چې په داسې وضعیت کې به ایران ورو ورو په افغانستان کې خپلو «دودیزو متحدینو» ته نږدې شي. د هغه په وینا، د طالبانو دوامداره ملاتړ د تهران له اوږدمهالو ګټو سره اړخ نهلګوي.
د دغه پخواني افغان چارواکي په باور، د ایران او پاکستان نږدې اړیکې هم د تهران او طالبانو پر اړیکو اغېز کولای شي. هغه وايي، ایران به له طالبانو سره د اړیکو د ساتلو لپاره خپلې اړیکې له پاکستان سره قرباني نهکړي.
د طالبانو او پاکستان ترمنځ کړکېچ؛ امریکا د اسلاماباد تر څنګ ودرېده | افغانستان انټرنشنل پښتو
وحید عمر په پاکستان کې د وسلهوالو ډلو د بریدونو زیاتوالی او له اسلاماباد څخه د امریکا ډیپلوماټیک ملاتړ د سیمې د امنیتي وضعیت د بدلون نښې بللي او ویلي یې دي، چې پاکستان د طالبانو پرتله ډېر سیاسي نفوذ او ځواک لري.
تر دې وړاندې ایران د اسلامي جمهوریت د پخواني مشر علي خامنهیي د جنازې په مراسمو کې د ګډون لپاره د طالبانو مخالفو څېرو ته هم بلنه ورکړې وه. د مقاومت جبهې مشر احمد مسعود او د افغانستان د خلکو د اسلامي وحدت ګوند مشر محمد محقق په دغو مراسمو کې ګډون کړی وو.
ایران او طالبانو په دې وروستیو کلونو کې، سره له دې چې په ځینو برخو کې اختلافات لري، خپلې اړیکې ساتلې دي. خو د طالبانو او پاکستان اړیکې د هوايي بریدونو او د ډیورند کرښې په اوږدو کې د ناامنیو د زیاتېدو له امله ترینګلې پاتې شوې دي.
په همدې حال کې د طالبانو مخالفې ډلې تمه لري، چې تهران او اسلاماباد به د افغانستان د سیاسي معادلو په برخه کې د دوی له دریځونو او غوښتنو هم ملاتړ وکړي.
