ټرمپ: کولای شو د خامنهیي په مراسمو کې ایراني چارواکي لهمنځه یوسو خو دا کار نهکوو
د امریکا ولسمشر ډونالډ ټرمپ د ایران د پخواني مشر علي خامنهیي د جنازې او ښخولو مراسمو ته په اشارې سره وویل، چې امریکا کولای شي په دې مراسمو کې حاضر د ایران ټول چارواکي په یوه برید سره لهمنځه یوسو، خو دا کار به ونهکړي.
هغه له اکسیوس سره په مرکه کې وویل: «دوی ټول هلته دي. په یوه برید سره [کولای شو ټول له منځه یوسو]، خو دا کار نهکوو، ځکه په هغه صورت کې به بیا د خبرو اترو لپاره څوک پاتې نهشي».
نوموړي زیاته کړه، چې د ایران چارواکي «زارۍ کوي څو یوې هوکړې ته ورسېږو»، خو دواړو لورو پرېکړه کړې، چې مذاکرات د علي خامنهیي د ښخولو د مراسمو تر پای ته رسېدو پورې د یوې اونۍ لپاره ودروي.
ټرمپ زیاته کړه، چې په دې موده کې به هېڅ یو لوری پر بل لوري ډزې ونهکړي.
د ایران سپاه پاسداران د جمعې په ورځ (د چنګاښ ۱۲مه) د علي خامنهیي د جنازې مراسمو په مناسبت په یوه بیان کې خبرداری ورکړی وو: «د دښمن لهخوا هر ډول تېروتنه به تر بل هر وخت له پرېکنده او پیاوړي ځواب سره مخ شي».
د علي خامنهیي او د هغه د کورنۍ د نورو وژل شويو غړو د رسمي مخه ښي مراسم د جمعې په سهار (د چنګاښ ۱۲مه) د تهران د امام خميني په مصلی کې د يو شمېر بهرنيو شخصيتونو په ګډون پيل شوي.
د ایران چارواکو د علي خامنهیي د جنازې او خاورو ته د سپارلو لپاره د يوې اونۍ مراسم پلان کړي دي. ټاکل شوې، چې د هغه مړی له تهران وروسته قُم، نجف او کربلا ته ولېږدول شي او په پای کې د راتلونکې پنجشنبې په ورځ د مشهد ښار د امام رضا د زيارت ترڅنګ خاورو ته وسپارل شي.
