د ملګرو ملتونو د پراختیايي پروګرام (یو این ډي پي) مشر الکساندر ډي کرو، افغانستان ته د خپل سفر پر مهال ویلي، په دې هېواد کې کړکېچونه په ندرت سره جلا جلا رامنځته کېږي او د افغانستان درې پر څلورمه برخه خلک د ژوند د لومړنیو اړتیاوو د پوره کولو توان نه لري.
هغه پر ایکس خواله رسنۍ کې لیکلي چې بېړنۍ بشري مرستې د خلکو ژوند ژغوري، خو پراختیايي پروګرامونه کولای شي خلکو ته د خپل راتلونکي د بیا جوړولو فرصت برابر کړي.
ډي کرو، چې د ننګرهار ولایت د درېنور ولسوالۍ د سوتن کلي ته تللی، ویلي چې د دغه سفر موخه یې دا وه چې له نږدې وګوري د ملګرو ملتونو د پراختیايي پروګرام فعالیتونه څنګه له بحرانونو سره د مخامخ ټولنو په ملاتړ کې مرسته کوي.
د هغه په وینا، د سوتن کلي اوسېدونکي د تېر کال له زلزلې وروسته د خپلې سیمې د بشپړې ویجاړۍ په اړه اندېښمن وو، خو د کورونو د بیارغونې، د لومړنیو خدمتونو د بېرته فعالولو او د خلکو د معیشت د سرچینو د احیا په برخه کې د ملاتړ له امله دغه کلی بېرته عادي ژوند ته ورګرځېدلی دی.
هغه زیاته کړه چې د سوتن د اوسېدونکو له لوري د ملګرو ملتونو د پراختیايي پروګرام او د هغه د همکارو بنسټونو د فعالیتونو ستاینه پرې ژور اغېز کړی دی.
ډي کرو همدارنګه ویلي، د اقلیمي بدلون اغېزې په افغانستان کې یو څرګند واقعیت دی او د دغه هېواد خلک یې پایلې په مستقیم ډول تجربه کوي.
د نوموړي په خبره، په سوتن کلي کې د سېلابونو پر وړاندې د ساتنې او اوبو لګولو پروژه، چې د ملګرو ملتونو د پراختیايي پروګرام په ملاتړ پلې شوې، د طبیعي پېښو د ګواښ په کمولو، د کرنیزو ځمکو په ساتنه او د خلکو لپاره د عایداتي فرصتونو په رامنځته کولو کې مهم رول لوبولی دی.
هغه زیاته کړې چې د دغې پروژې په پلي کولو کې ښځې او نارینه دواړه ګډه ونډه لرلې ده.
د یادونې وړ ده چې د تېر کال د وږي میاشتې ۶ او ۵ درجې زلزلو د افغانستان ختیځ ولایتونه، په ځانګړي ډول ننګرهار او کونړ، ولړزول، چې له امله یې لسګونه کسان ووژل شول او ګڼ کورونه ویجاړ شول.
