د طالبانو دفاع وزیر یعقوب مجاهد بدخشان ته د خپل سفر په لړ کې په وردوج ولسوالۍ کې له یوه دارالعلوم څخه لیدنه کړې او ویلي یې دي چې د ټولنې په فکري او اخلاقي روزنه کې د علماوو او مدرسو رول مهم دی. هغه زیاته کړې، د دیني مدرسو د پرمختګ او ملاتړ لپاره به خپلو همکاریو ته دوام ورکړي.
محمد یعقوب مجاهد چې نن سهار (یکشنبه د چنګاښ ۱۴مه) په شمال ختیځو سرحدي سیمو کې له سرحدي ځواکونو او پوستو څخه د لیدنې لپاره بدخشان ته تللی، په ترڅ کې یې په وردوج ولسوالۍ کې د «مولوي محمد امین» له دارالعلوم څخه هم لیدنه وکړه.
نوموړي د یاد دارالعلوم د مسوولینو، استادانو او زدهکوونکو د ستونزو له اورېدو وروسته د دیني زده کړو د پیاوړتیا، د علمي کچې د لوړولو او د اسلامي او ملي ارزښتونو د ساتنې پر اهمیت هم ټینګار وکړ.
هغه همداراز د ټولنې په فکري او اخلاقي روزنه کې د دیني علماوو او مدرسو رول مهم وباله او ډاډ یې ورکړ، چې دوی به د دیني مدرسو د پرمختګ او ملاتړ لپاره خپلې همکارۍ دوامداره وساتي.
محمد یعقوب مجاهد نن سهار (یکشنبه د چنګاښ ۱۴مه) په شمال ختیځو سرحدي سیمو کې له سرحدي ځواکونو او پوستو څخه د لیدنې بهیر پیل کړ. نوموړي د خپل سفر پر مهال د افغانستان له هغو مهمو ستراتیژیکو سرحدي سیمو څخه هم لیدنه وکړه چې له چین، تاجکستان او ډیورنډ کرښې سره نښتي دي.
د طالبانو دفاع وزارت د یکشنبې په ماخوستن (د چنګاښ ۱۴مه) د یوې خبرپاڼې په خپرولو سره زیاته کړې، چې په دې سفر کې د دغې ډلې لوی درستیز فصیحالدین فطرت هم د محمد یعقوب مجاهد ملتیا کوله.
