افغانستان انټرنشنل ـ پښتو
د طالبانو باخبره سرچینو افغانستان انټرنشنل ته وویل، چې د دې ډلې د استخباراتو د ذوالفقار ځانګړې قطعې یو نظامي موټر د بدخشان ولایت په مایمي ولسوالۍ کې اوبو ته لوېدلی. په دې پېښه کې د طالبانو د استخباراتو پنځه غړي لادرکه او دوه ټپیان شوي. ټپیان فېض اباد ته لېږدول شوي دي.
د طالبانو باخبره سرچینو نن یکشنبه، د چنګاښ پر ۱۴مه وویل، چې دا پېښه نن د بدخشان ولایت د مایمي ولسوالۍ اړوند په غز دره سیمه کې شوې ده.
د ورکو شوو پنځو تنو طالبانو په اړه لاتر اوسه معلومات نشته.
سرچینې زیاتوي، « دا موټر د هغه کاروان برخه وه، چې له فېض اباد څخه نسي ولسوالۍ ته پر لار و».
طالبانو تر اوسه ددې پېښې د څرنګتیا په اړه څه نه دي ویلي او نه یې هم پېښه تایید کړې ده.
سرچینو د یکشنبې په ورځ له بدخشان نه افغانستان انټرنشنل ته وویل، چې طالبانو د تازه دمه پوځي کاروان یوه برخه د نسي ولسوالۍ په مرکز کې د دې ډلې د ناراضي قوماندان جمعه خان فاتح په اصلي اډه کې ځای پر ځای کړې ده.
د طالبانو دفاع وزیر ملایعقوب مجاهد هم بدخشان ته رسېدلی دی.
د سرچینو په وینا، فاتح له خپلو ځواکونو غوښتي چې نسي ولسوالۍ ته د طالبانو د ځواکونو د ننوتلو مخه ونه نیسي او د نښتې له پیلولو ډډه وکړي.
د فاتح ځواکونه په قوغذ، زغر، شاخ دره، بر او ښکته وجم سیمو کې په خپلو سیمه ییزو پوځي مرکزونو کې حضور لري.
له بدخشان نه سرچینې وایي چې دغه ځواکونه د جمعه خان فاتح د ځواکونو د بې وسلې کولو لپاره نسي ته لېږل شوي دي.
