د افغانستان انټرنشنل ـ پښتو خبریال
له پاکستان نه د افغان کډوالو د ستنېدو لړۍ په چټکۍ روانه ده او اوس دغه لړۍ د خیبرپښتونخوا پېښور ښار ته هم غځېږي. په پېښور کې د هغه افغان کډوالو پرضد د پراخو عملیاتو چمتووالی وروستي پړاو ته رسېدلی، چې د قانوني اسنادو او ویزو پرته په دغه ښار کې مېشت دي.
د پاکستان د کورنیو چارو وزارت ټولو ایالتي ادارو ته لارښوونه کړې، چې د ۲۰۲۶کال د جولای له ۱۰مې وروسته له ویزو پرته په پاکستان کې مېشت افغانان ونیسي. د پولیسو په وینا؛ د پېښور په نمک منډۍ، قصه خوانۍ بازار، اوړو مارکېټ، اشرف روډ، خیبر بازار، یونیورسټي روډ، فنډو سبزي منډۍ او د پېښور کېنټ په ګډون د ښار په ګڼو سوداګریزو سیمو کې به د بېاسناده افغان کډوالو پر ضد ګډ عملیات ترسره شي.
دغه عملیات به یوازې بازارونو او مارکېټونو پورې محدود نه وي؛ بلکې په استوګنیزو سیمو او شاوخوا کلیو کې به هم روان وي. د یادو عملیاتو د پیل لپاره اوس یوازې درې ورځې پاتې دي؛ خو له بلې خوا په خپله خوښه د ستنېدوکو افغان کډوالو لړۍ هم دوام لري.
د شمېرو له مخې؛ یوازې د جولای له لومړۍ نېټې تر ۱۴زره زیات افغان کډوال په خپله خوښه افغانستان ته ستانه شوي دي. له بل پلوه د راتلونکو عملیاتو له امله په پېښور کې ګڼ افغانان خپل کورونه، هټۍ او کاروباري مرکزونه خالي کوي.
د ملګرو ملتونو د کډوالو ادارې ویاند قیصر اپریدی وایي، د ۲۰۲۳کال له پیل راهیسې تراوسه شاوخوا ۲۵ لکه افغان کډوال له پاکستان نه افغانستان ته ستانه شوي دي چې له دې ډلې نږدې دوه نیم لکه کسان د جبري اېستلو د پالیسۍ له مخې افغانستان ته لېږل شوي دي.
