د بلوچستان اعلی وزیر: د ترهګرۍ پر ضد جګړه اوس په پرېکنده پړاو کې ده
د بلوچستان اعلی وزیر سرفراز بګټي په زیارت سیمه کې رسنیو ته ویلي، چې د ترهګرۍ پر وړاندې روانه جګړه پرېکنده پړاو ته رسېدلې ده او حکومت به په دې سختو شرایطو کې خپل ولس هېڅکله یوازې پرېنږدي.
هغه ټینګار وکړ چې که څه هم اوسني شرایط ستونزمن دي، خو د بلوچستان حکومت به له خپلو مسوولیتونو څخه شاته نه شي.
سرفراز بګټي اعلان وکړ چې د زیارت سیمې په وروستۍ پېښه کې د وژل شویو پولیسو د ماشومانو د زده کړې او پالنې ټول مسوولیت او لګښت به د بلوچستان حکومت پر غاړه واخلي.
د بلوچستان اعلی وزیر خپلې کابینې ته په خطاب کې وویل چې په تړلو خونو کې په ناسته د داسې سختو شرایطو مقابله نهشي کېدای. هغه زیاته کړه چې د خلکو د امنیت او خوندیتوب لپاره باید چارواکي په خپله ډګر ته ووځي او د وضعیت د ښه کولو لپاره عملي ګامونه پورته کړي.
بګټي په خپلو خبرو کې ومنله چې په بلوچستان کې امنیتي وضعیت ښه نه دی، خو زیاته یې کړه چې حکومت د خلکو د سر او مال ساتنې ته ژمن دی. هغه ټینګار وکړ چې د ترهګرۍ پر وړاندې په دې روانه جګړه کې به له ټولو شته امکاناتو څخه کار واخیستل شي.
دا څرګندونې په داسې حال کې کېږي چې تحریک طالبان پاکستان د بلوچستان په زیارت سیمه کې د پولیسو پر یوې پوستې د برید مسوولیت منلی دی. دغې ډلې ادعا کړې ده چې په دغه برید کې یې له ۲۰ څخه زیاتو پاکستاني ځواکونو ته مرګژوبله اړولې ده.
