فوټبال نړیوال جام؛ ارجنټاین په وروستیو شېبو کې مصر مات کړ او ۸ غوره پړاو ته یې لار ومونده

دغه لوبه د سې‌شنبې په ورځ ترسره شوه او لومړی د مصر یاسر ابراهیم په ۱۵مه دقیقه او بیا مصطفی زیکو په ۵۷مه دقیقه کې ګولونه ووهل او تر ۷۹مې دقیقې پورې یې دوه پر صفر مخکښي وساتله.

د ارجنټاین لوبغاړي کریستیان رومېرو په ۷۹مه دقیقه د توپیر کمولو ګول وکړ. پنځه دقیقې وروسته لیونل مېسي د لوبې د مساوي کولو ګول وواهه او لوبه یې ۲-۲ کړه.

په داسې حال کې چې لوبه د اضافي وخت وروستیو شېبو ته رسېدلې وه، انزو فرناندېز په۹۰+۳مې دقیقې کې درېیم ګول ترسره کړ او ارجنټاین ته یې بریا ورپه برخه کړه.

ارجنټاین تر هغه وړاندې د نړیوال جام له یوه ستر او ناببره حذف سره مخ و، خو د لوبې په وروستیو دقیقو کې یې نړیوال جام ته د بېرته راستنېدنو تاریخي شېبه ثبت کړه.

لیونل مېسي په دې لوبه کې د پنالټۍ د لارې د ګول وهلو فرصت هم له لاسه ورکړ. نوموړي په ۲۰مه دقیقه کې پنالټي ضایع کړه، چې دا په روان نړیوال جام کې د هغه دویمه ناکامه پنالټي وه.

مصر هم د لوبې پر مهال یو بل ګول ترسره کړی و، خو د ویډیويي مرستندویه داور(وي ای ار) له ارزونې وروسته د حملې په بهیر کې د تېروتنې له امله لغوه اعلان شو.

ارجنټاین به اوس د نړیوال جام په کوارټر فاینل کې د خپلې بلې سیالې لوبډلې پر وړاندې میدان ته ښکته شي.