ټرمپ وايي له ایران سره معامله یوازې د وخت ضایع کول دي
د امریکا ولسمشر ډونالډ ټرمپ ویلي، چې له ایران سره معامله او خبرې اترې یوازې د وخت ضایع کول دي او د ده په اند نور له تهران سره د خبرو بهیر پای ته رسېدلی دی.
ټرمپ د ترکیې په انقره کې د ناټو سرمشریزې په څنډه کې خبریالانو ته وویل، چې د ایران چارواکي په خبرو اترو کې رښتیني نه دي او له هرې هوکړې وروسته خپلې ژمنې ماتوي.
ټرمپ وویل: «زما په اند، هر څه پای ته رسېدلي دي. نور نه غواړم ورسره معامله وکړم. هغوی ناروغان، زورزیاتي کوونکي او بې رحمه خلک دي». هغه ادعا وکړه، چې که تهران اټومي وسلې لرلی، خامخا به یې کارولې.
ټرمپ وویل: «موږ پر یوه تړون هوکړه کوو، خو کله چې له غونډې ووځي (ایران) او له رسنیو سره خبرې وکړي، وایي چې موږ هېڅکله ورسره خبرې نه دي کړې. هغوی درواغ وایي».
د ټرمپ په وینا، له ایران سره معامله کول یوازې د وخت ضایع کول دي.
د امریکا ولسمشر زیاته کړه چې د ده مذاکره کوونکي لا هم خبرو ته چمتو دي، خو وروستۍ پرېکړه به خپله کوي.
