د اسلاماباد سترې محکمې غوښتنه کړې چې د عمران خان د انفرادي بند ادعاوې وڅېړل شي
د اسلاماباد سترې محکمې د اډیاله زندان چارواکو ته امر کړی، چې د پاکستان د پخواني لومړي وزیر او د تحریک انصاف ګوند بنسټګر عمران خان او د هغه د مېرمنې بشرا بيبي د انفرادي بند په اړه بشپړ راپور وړاندې کړي.
یادې محکمې ویلي، د دغه ډول جدي ادعاوو له اورېدو او د زندان د چارواکو له وضاحت پرته سترګې نهشي پټېدای. د لس مخیز لیکلي حکم له مخې؛ عدالت د اډیاله زندان مشر، د زندانونو عمومي مفتش او د احتساب ملي ادارې ته خبرتیاوې استولې او غوښتنه یې کړې، چې روښانه کړي ایا عمران خان او بشرا بيبي په انفرادي بند کې ساتل کېږي؟ که هو د چا په امر، د کوم قانون له مخې او تر کومې مودې؟
محکمې دا هم غوښتي، د دواړه بندیانو د روغتیايي وضعیت او هغو اسانتیاوو په اړه راپور وړاندې شي چې د زندان د اصولو له مخې ورته برابرې شوې دي. د اورېدنې پرمهال د «نیب» څارنوال د انفرادي بند ادعاوې رد کړې او ویلي یې دي، چې دغه تورونه د سیاسي موخو لپاره مطرح شوي؛ خو محکمې بیا هم د زندان له ادارې د حقایقو پر بنسټ د راپور غوښتنه وکړه.
د دې قضیې راتلونکې اورېدنه د اګست شپږمې ته وځنډول شوه.
بلخوا د اسلاماباد سترې محکمې عمران خان او بشرا بيبي ته د ۱۹۰ مېلیون پونډو د فساد قضیې د استیناف په اړه وروستی فرصت ورکړی، چې خپل دلایل وړاندې کړي. محکمې خبرداری ورکړی، که د دوی وکیل په راتلونکې اورېدنه کې استدلال ونه کړي؛ نو عدالت به د شته اسنادو پر بنسټ پرېکړه وکړي او نور ځنډ به ونه مني.
عمران خان او بشرا بيبي دامهال د راولپنډۍ په اډیاله زندان کې بندیان دي. عمران خان د ۲۰۲۳کال له اګست میاشتې راهیسې په بند کې دی او د فساد، توشخانه او نورو قضیو ترڅنګ د مئ نهمې د اعتراضونو په تړاو هم له محاکمو سره مخ دی.
